ट्रम्पको धम्की : ‘क्युबा त्यसपछि छ, मिडियाले नसुने झैं गरिदेऊ’
मियामी — अमेरिकी राष्ट्रपति डोनाल्ड ट्रम्पले भेनेजुएला र इरानमाथि आक्रमण गरेलगत्तै ‘क्युबा अर्को लक्ष्य हो’ भन्दै धम्की दिएका छन्। फ्लोरिडाको मियामीमा आयोजित ‘फ्युचर इन्भेस्टमेन्ट इनिसिएटिभ’ सम्मेलनमा बोल्दै ट्रम्पले भने, ‘खैर, क्युबा त्यसपछि नै छ। तर मैले त्यो भनेको मान्नु हैन है। मिडियाले कृपया त्यो अभिव्यक्तिलाई बेवास्ता गरिदिऊन्। धेरै धन्यवाद। क्युबा अर्को हो।’
ट्रम्पको यो अभिव्यक्ति अमेरिकी सेनाले जनवरी ३ मा भेनेजुएलामा आक्रमण गरी तेलले सम्पन्न दक्षिण अमेरिकी राष्ट्रका राष्ट्रपति निकोलस मादुरोलाई जबरजस्ती पक्राउ गरेको र फेब्रुअरी २८ मा इरानविरुद्ध इजरायलसँगको संयुक्त ठूलो आक्रमण सुरु गरेको घटनाको केही समयपछि आएको हो।
क्युबा दशकौँदेखि अमेरिकी प्रतिबन्धका कारण गम्भीर आर्थिक तथा ऊर्जा सङ्कटको सामना गरिरहेको छ। संयुक्त राष्ट्र संघका अनुसार इन्धन अभावले त्यो देशलाई मानवीय सङ्कटतर्फ धकेलिरहेको छ। यसै महिनाको सुरुमा पनि ट्रम्पले ‘क्युबा चाँडै नै ढल्ने’ धम्की दिएका थिए तर उनको प्रशासन अहिले इरानमा केन्द्रित रहेको बताएका थिए।
ट्रम्पको ‘क्युबा अर्को हो’ अभिव्यक्तिले अन्तर्राष्ट्रिय समुदायमा चासो र आक्रोश बढाएको छ भने विश्लेषकहरूले यसलाई अमेरिकी विदेश नीतिको उग्र रूपको सङ्केतका रूपमा हेरेका छन्।
