नाबालिका शोषण आरोपमा लुम्बिनीकी सभासद पक्राउ, पुरानो घटनाले पुनः चर्कियो बहस
काठमाडौं / लुम्बिनी प्रदेशकी प्रदेशसभा सदस्य रेखा शर्मा पक्राउ परेकी छिन्। एमालेबाट निर्वाचित उनलाई आइतबार राति काठमाडौंको धुम्बराहीबाट प्रहरीले नियन्त्रणमा लिएको हो।
उपत्यका अपराध अनुसन्धान कार्यालयबाट खटिएको टोलीले उनलाई पक्राउ गरेको जानकारी कार्यालय प्रमुख प्रहरी वरिष्ठ उपरीक्षक सन्तोष खड्काले दिएका छन्। प्रहरीका अनुसार उनीमाथि नाबालिकालाई घरेलु कामदारका रूपमा राखेर बालबालिकाविरुद्धको कसुर गरेको आरोप लागेको छ।
यो घटना केही वर्षअघिको एक प्रकरणसँग जोडिएको छ, जहाँ काठमाडौं महानगरपालिकाले उनको घरबाट एक बालिकाको उद्धार गरेको थियो। उक्त घटनाले त्यसबेला पनि व्यापक चर्चा पाएको थियो।
सोही सन्दर्भमा तत्कालीन काठमाडौं महानगरपालिका मेयर बालेन्द्र (बालेन) शाहले २०८१ माघ २९ गते सामाजिक सञ्जालमार्फत उक्त बालिकाप्रति सहानुभूति व्यक्त गर्दै न्याय नपाएकोप्रति असन्तोष जनाएका थिए। उनले पीडित बालिकालाई हिम्मत नहार्न आग्रह गर्दै शिक्षा र चेतनाबाट यस्ता अन्यायविरुद्ध लड्नुपर्ने सन्देश दिएका थिए।
हाल पुनः पक्राउसँगै उक्त पुरानो घटनाले फेरि बहसको केन्द्र लिएको छ। बालअधिकार, न्यायिक प्रक्रिया र राजनीतिक प्रभावबारे प्रश्न उठ्न थालेका छन्।
प्रहरीले घटनाबारे थप अनुसन्धान भइरहेको जनाएको छ।
