कर्णालीको बजेट प्राथमिकताका विषयमा प्रधानमन्त्रीसँग सांसदहरूको सामूहिक भेट : पुनर्निर्माणदेखि लोकमार्गसम्मको छलफल
काठमाडौं — कर्णाली प्रदेशबाट निर्वाचित प्रतिनिधिसभा सदस्यहरूले प्रधानमन्त्री बालेन्द्र शाहसँग आगामी बजेटमा कर्णालीलाई प्राथमिकता दिने, जाजरकोट भूकम्पपछिको राहत तथा पुनर्निर्माण, शासकीय सुधार, भौतिक पूर्वाधार निर्माणलगायतका विषयमा छलफल गरेका छन्। प्रधानमन्त्री शाहको निमन्त्रणामा सोमबार सिंहदरबारस्थित प्रधानमन्त्री तथा मन्त्रिपरिषद कार्यालयमा भएको भेटमा सांसदहरूले कर्णालीका समग्र विकासका मुद्दाहरू उठाएका हुन्।
भेटपछि सामाजिक सञ्जाल मार्फत जानकारी दिँदै नेपाली कम्युनिस्ट पार्टीका नेता तथा सल्यान जिल्लाबाट प्रतिनिधिसभा सदस्य रमेश मल्लले कर्णालीका सांसदहरूले आगामी बजेटमा कर्णालीलाई प्राथमिकता दिन, जाजरकोट भूकम्पपछिको राहत तथा पुनर्निर्माण, मनसुनपूर्व तयारी, कर्णाली, भेरी, राप्ती लगायतका विभिन्न करिडोर, मध्य पहाडी लोकमार्ग, मदन भण्डारी राजमार्ग, लुम्बिनी–रारा सडक लगायतका पूर्वाधारको विषयमा छलफल भएको बताए।
यसैगरी भेटमा स्वास्थ्य बीमा, मातृ–शिशु पोषण, दैलेख पेट्रोलियम अनुसन्धान, वन्यजन्तुबाट हुने जोखिम व्यवस्थापन, साथै सञ्चार, विद्युत्, खानेपानी, सिँचाइ र कृषि क्षेत्रमा आवश्यक प्राथमिकताबारे समेत गहन छलफल भएको मल्लले उल्लेख गरेका छन्।
प्रधानमन्त्री शाहले भेटमा कर्णालीलाई आगामी बजेटमा न्यायोचित सम्बोधन गर्ने, आवश्यक कामहरू शीघ्र अघि बढाउन समन्वय गर्ने र यस वर्ष शासकीय सुधारमा विशेष ध्यान दिने प्रतिबद्धता व्यक्त गरेको सांसद मल्लले जानकारी दिएका छन्।
कर्णाली प्रदेशबाट निर्वाचित सांसदहरूले प्रधानमन्त्रीसमक्ष आ–आफ्नो निर्वाचन क्षेत्रका तत्कालीन समस्या र दीर्घकालीन योजनाबारे जानकारी गराएका थिए। प्रधानमन्त्री शाहले कर्णालीको विकासका लागि बजेट विनियोजनमा विशेष ध्यान दिने र कर्णाली सांसदहरूसँग नियमित समन्वय गर्ने आश्वासन दिएको बताइएको छ।
यसअघि प्रधानमन्त्री शाहले विभिन्न प्रदेशका सांसदहरूसँग क्षेत्रगत समस्या र समाधानका उपायबारे छलफल गर्दै आएका छन्। सोही क्रममा सोमबार कर्णाली प्रदेशका सांसदहरूसँगको भेटले विकट र पिछडिएको मानिने कर्णालीको विकासका लागि सरकारको प्राथमिकता निर्धारणमा सहयोग पुग्ने अपेक्षा गरिएको छ।
