इराकी कुर्दिस्तानका राष्ट्रपतिको निवासमा ड्रोन आक्रमण : रुसको कडा निन्दा
मस्को — इराकको कुर्दिस्तान क्षेत्रका राष्ट्रपति नेचिर्भान बार्जानीको निवासमा भएको ड्रोन आक्रमणप्रति रुसले गम्भीर चासो व्यक्त गर्दै यस कार्यको कडा निन्दा गरेको छ। सो आक्रमणलाई पर्सियन खाडी क्षेत्रमा जारी सशस्त्र द्वन्द्वको विस्तारका रूपमा हेर्दै रुसले तुरुन्त युद्धविराम र राजनीतिक तथा कूटनीतिक समाधानको पक्षमा आफ्नो धारणा पुनः पुष्टि गरेको छ।
रुसी विदेश मन्त्रालयकी प्रवक्ता मारिया जाखारोभाले सोमबार जारी गरेको वक्तव्यमा भनिन्, ‘पर्सियन खाडी क्षेत्रमा जारी सशस्त्र द्वन्द्व तथा प्रशासनिक र नागरिक पूर्वाधारमाथि बढ्दो आक्रमणले हामीलाई गम्भीर रूपमा चिन्तित बनाएको छ।’
प्राप्त जानकारीअनुसार मार्च २८ मा इराकी कुर्दिस्तान क्षेत्रका राष्ट्रपति नेचिर्भान बार्जानीको दोहुकस्थित निवासमा पहिचान नखुलेको आत्मघाती ड्रोनद्वारा आक्रमण गरिएको थियो। यो आक्रमणका आयोजकहरूले अमेरिका–इजरायलको अकारण आक्रमणबाट सुरु भएको अभूतपूर्व सैन्य तथा राजनीतिक सङ्कटलाई भौगोलिक रूपमा थप विस्तार गर्न खोजेको जाखारोभाले बताइन्।
रुसले यस कार्यको कडा निन्दा गर्दै भन्यो, ‘यस आक्रमणका आयोजकहरूले अभूतपूर्व सैन्य तथा राजनीतिक सङ्कटको भौगोलिक दायरा विस्तार गर्न खोजेको स्पष्ट देखिन्छ। हामी शत्रुता तुरुन्त बन्द गरी राजनीतिक तथा कूटनीतिक समाधानको पक्षमा दृढतापूर्वक उभिएका छौँ।’
रुसले द्वन्द्वका सबै पक्षहरूलाई गैरसैन्य लक्ष्यमाथिको कुनै पनि आक्रमणबाट अलग रहन निरन्तर आह्वान गरिरहेको पनि प्रवक्ता जाखारोभाले स्मरण गराइन्।
यस घटनाले पहिले नै जटिल बनेको मध्यपूर्वी भूराजनीतिमा थप तनाव थपेको छ। अमेरिका–इजरायलले इरानविरुद्ध गरेको आक्रमणपछि यस क्षेत्रमा विभिन्न गुट र समूहहरूबीच तनाव चुलिँदै गइरहेको अवस्थामा कुर्दिस्तान क्षेत्रको नेतृत्वमाथि नै आक्रमण हुनुले सुरक्षाको गम्भीर प्रश्न खडा गरेको छ। रुसको यो वक्तव्यले क्षेत्रीय स्थिरताका लागि तत्काल राजनीतिक समाधानको आवश्यकता औँल्याएको छ।
