दुई महिनामा डोनेत्स्कबाट सेना नहटाए शान्तिका सर्तहरू बदलिने रूसको चेतावनी

काठमाडौँ — युक्रेनी राष्ट्रपति भोलोदिमिर जेलेन्स्कीले रूसले डोनेत्स्क क्षेत्रबाट युक्रेनी सेना फिर्ता नभए दुई महिनाभित्र शान्तिका सर्तहरू परिवर्तन हुने चेतावनी दिएको बताएका छन्। अमेरिकी मध्यस्थकर्ताहरूका मार्फत यो सन्देश रूसले पुर्याएको जेलेन्स्कीको भनाइ छ।

युक्रेनी राष्ट्रपतिले डोनेत्स्क क्षेत्रबाट युक्रेनी सेनाको फिर्तीलाई रूसले युद्ध अन्त्यको सर्तका रूपमा अघि सारेको पुष्टि गरेका छन्। उनले भने, ‘रूसले दुई महिनाभित्र डोनबास क्षेत्र आफ्नो नियन्त्रणमा लिने योजना बनाएको छ। यदि त्यति बेलासम्म युक्रेनले आफ्ना सेना फिर्ता नगरे भने शान्तिका सर्तहरू फरक हुनेछन्। मलाई अचम्म लाग्छ कि अहिले पनि कसैले यसलाई विश्वास गर्न सक्छ।’

जेलेन्स्कीको यो अभिव्यक्ति युक्रेन र रूसबीच जारी युद्धको सम्भावित शान्ति वार्ताका विषयमा पछिल्लो समय देखिएको उतारचढावपूर्ण अवस्थाका बीच आएको हो। रूसले पूर्वी युक्रेनको डोनेत्स्क क्षेत्रमा आफ्नो सैन्य अभियान तीव्र बनाइरहेको छ भने युक्रेनले आफ्ना रणनीतिक स्थानहरू जोगाउन सकेसम्म प्रतिरोध गर्ने प्रतिबद्धता जनाइरहेको छ।

रक्षा विश्लेषकहरूका अनुसार रूसको यो चेतावनीले युक्रेनमाथि दबाब बढाउन मात्र नभई अन्तर्राष्ट्रिय समुदायलाई पनि सन्देश दिन खोजेको छ। डोनेत्स्क क्षेत्र रणनीतिक रूपमा मात्र नभई औद्योगिक दृष्टिले पनि महत्त्वपूर्ण मानिन्छ। यस क्षेत्रमाथिको नियन्त्रणले युद्धको गतिलाई नै निर्धारण गर्न सक्ने विश्लेषण गरिएको छ।

यता, जेलेन्स्कीले रूसी चेतावनीको आलोचना गर्दै यसलाई ‘अविश्वसनीय’ भन्दै खारेज गरेका छन्। तर उनले रूसले डोनेत्स्क क्षेत्रबाट सेना फिर्तालाई युद्धविरामको पूर्वसर्त बनाएको तथ्यलाई स्वीकार गरेका छन्। यसले युद्धविरामका लागि रूसले तोकेको प्रमुख शर्त डोनेत्स्क नै रहेको संकेत गर्दछ।

अन्तर्राष्ट्रिय मध्यस्थकर्ताहरूले दुवै पक्षलाई वार्ताको टेबलमा ल्याउन प्रयास जारी राखेका छन्। तर, रूसले तोकेको समयसीमा र युक्रेनले गर्दै आएको ‘कुनै पनि क्षेत्र नछोड्ने’ धारणाले शान्ति प्रक्रियालाई जटिल बनाइरहेको देखिन्छ।

रूसी पक्षले भने औपचारिक रूपमा यस्तो दुई महिनाको समयसीमाबारे आधिकारिक टिप्पणी गरेको छैन। तर, रूसी सैनिक कमान्डले हालैका दिनहरूमा डोनेत्स्क क्षेत्रमा आक्रामक अभियानलाई निरन्तरता दिँदै धेरै स्थानीय प्रशासनिक केन्द्रहरूमा नियन्त्रण बलियो बनाएको छ।

यो समाचार तयार पार्दासम्म युक्रेनी सेनाले डोनेत्स्क क्षेत्रका मोर्चाहरूमा आफ्नो रक्षात्मक स्थितिलाई मजबुत बनाइरहेको जनाइएको छ। शान्ति वार्ताको सम्भावना अझै अन्योलग्रस्त रहेको छ।