अस्थायी युद्धविराम होइन, दिगो शान्ति चाहन्छौं : रुसको स्पष्ट धारणा
मस्को — युक्रेनको द्वन्द्वमा अस्थायी युद्धविराम नमान्ने र यसको सट्टा दिगो शान्तिको पक्षमा रहेको क्रेमलिनले स्पष्ट पारेको छ। रुसी राष्ट्रपति कार्यालयका प्रवक्ता दिमित्री पेस्कोभले मंगलबार पत्रकार सम्मेलनमा युक्रेनी राष्ट्रपति भोलोदिमिर जेलेन्स्कीको इस्टर युद्धविराम प्रस्तावमा प्रतिक्रिया दिँदै यस्तो बताएका हुन्।
सोमबार जेलेन्स्कीले इस्टर पर्वका अवसरमा युद्धविरामको प्रस्ताव गरेका थिए। उक्त प्रस्तावलाई लक्षित गर्दै पेस्कोभले जेलेन्स्कीको यो प्रस्ताव स्पष्ट पहल नभएको टिप्पणी गरे। उनले भने, ‘हामी पुनः दोहोर्याउँछौं कि जेलेन्स्कीले जिम्मेवारी लिनुपर्छ र उपयुक्त निर्णय गर्नुपर्छ ताकि हामी केवल युद्धविराम होइन, शान्ति प्राप्त गर्न सकौं।’
रुसी प्रवक्ताका अनुसार जेलेन्स्कीले तुरुन्तै दिगो शान्ति समाधानतर्फ अग्रसर हुनुपर्छ, किनकि युक्रेनको लागि शान्तिको मूल्य समयसँगै बढ्दै जानेछ। ‘शान्ति, युद्धविराम मात्र होइन, त्यो हासिल गर्नका लागि उपयुक्त निर्णयको आवश्यकता छ,’ पेस्कोभले थपे।
यस वर्ष अर्थोडक्स इस्टर अप्रिल १२ मा युक्रेन र रुस दुवै देशमा मनाइँदै छ। यसै सन्दर्भमा जेलेन्स्कीले इस्टरको समयमा युद्धविराम गर्न प्रस्ताव गरेका थिए। तर रुसी पक्षले भने यसलाई ‘अस्पष्ट’ भन्दै अस्थायी युद्धविरामभन्दा दीर्घकालीन शान्ति समाधानमा जोड दिएको छ।
पेस्कोभको यो अभिव्यक्तिले युक्रेन–रुस द्वन्द्वमा कुनै पनि अस्थायी सम्झौताको सट्टा स्थायी राजनीतिक समाधान खोज्ने रुसको अडानलाई पुनः स्पष्ट पारेको छ। दुवै पक्षबीचको कूटनीतिक वार्ता लामो समयदेखि अलपत्र परेको अवस्थामा यो प्रस्ताव र प्रतिक्रियाले द्वन्द्व समाधानको दिशा भने टाढा देखाएको विश्लेषकहरू बताउँछन्।
