सार्वभौमिक स्वास्थ्य बीमामा ठगीविरुद्ध चीनको कडा मार्गदर्शन लागू
बेइजिङ — चीनले सार्वभौमिक आधारभूत स्वास्थ्य बीमामा हुने ठगी कडाइका साथ नियन्त्रण गर्न बुधबारदेखि नयाँ मार्गदर्शन लागू गरेको छ। राष्ट्रिय स्वास्थ्य सुरक्षा प्रशासनले यस वर्षको सुरुवातमा जारी गरेको यो मार्गदर्शनले आधारभूत स्वास्थ्य बीमा कोषको उपयोग, अनुगमन र व्यवस्थापनसम्बन्धी विस्तृत प्रावधानहरू समावेश गरेको छ।
नयाँ मार्गदर्शनअनुसार आधारभूत स्वास्थ्य बीमाअन्तर्गत रहेका अस्पताल, क्लिनिक र औषधि पसलजस्ता निर्दिष्ट संस्थाहरूले यदि मानिसहरूलाई प्रलोभन, झुट्टा विज्ञापन, अनुचित शुल्क छुट, वा अतिरिक्त रकम प्रदान गरी झूटो परिचयमा उपचार वा औषधि खरिद गर्न उक्साएमा त्यस्तो कार्य स्वास्थ्य बीमा ठगी मानिनेछ।
यसैगरी, यदि कुनै व्यक्तिले जानीबुझी स्वास्थ्य बीमा कोषको दुरुपयोग हुने गतिविधिमा सहभागिता जनाएमा उनीहरू पनि ठगीको कसुरमा दण्डनीय हुनेछन्। मार्गदर्शनले आधारभूत स्वास्थ्य बीमा कोषबाट भुक्तानी भइसकेका औषधि, चिकित्सा उपभोग्य सामग्री वा सेवा वस्तुहरूको पुनः विक्रीलाई पनि अवैध पुनःविक्रीको रूपमा परिभाषित गरेको छ।
राष्ट्रिय स्वास्थ्य सुरक्षा प्रशासनअन्तर्गत कोष सुपरिवेक्षण तथा व्यवस्थापन प्रभारी अधिकारी गु रोङले मंगलबार पत्रकार सम्मेलनमा जानकारी दिँदै भने, प्रशासनले देशभर निर्दिष्ट संस्था र बीमाकर्ता व्यक्ति दुवैलाई समेट्ने गरी स्वास्थ्य बीमा क्रेडिट व्यवस्थापनका लागि पायलट कार्यक्रम सञ्चालन गर्नेछ।
चीनको सार्वभौमिक आधारभूत स्वास्थ्य बीमा प्रणाली विश्वकै ठूलो जनसंख्यालाई समेट्ने स्वास्थ्य सुरक्षा योजना हो। यस प्रणालीमा हुने दुरुपयोग र ठगी नियन्त्रण गर्न सरकारले लगातार कडा कानुनी प्रबन्धहरू ल्याउँदै आएको छ। नयाँ मार्गदर्शनले कोषको संरक्षण, पारदर्शिता र दिगोपनालाई थप सुदृढ बनाउने अपेक्षा गरिएको छ।
यो मार्गदर्शन लागू भएपछि स्वास्थ्य बीमा प्रणालीमा हुने दुरुपयोग नियन्त्रण, ठगीका घटनामा कडा कारबाही र कोषको प्रभावकारी परिचालनमा सहयोग पुग्ने विश्वास गरिएको छ। साथै, यसले बीमाकर्ता र सेवा प्रदायक दुवैलाई जिम्मेवार बनाउँदै प्रणालीमा पारदर्शिता अभिवृद्धि गर्ने अपेक्षा गरिएको छ।
