ज्येष्ठ सदस्य केसीको आग्रह : ‘वाद, प्रतिवाद र संवाद नै लोकतन्त्रको आत्मा हुन्’

काठमाडौं । प्रतिनिधिसभाका ज्येष्ठ सदस्य अर्जुननरसिंह केसीले राजनीतिक स्थिरता, सुशासन र विधिको शासन स्थापनाका लागि सबै दलले सहकार्य र समन्वय गर्नुपर्नेमा जोड दिएका छन्। बिहीबार प्रतिनिधिसभाको पहिलो बैठकलाई सम्बोधन गर्दै उनले नवगठित संसद् र सरकारले जनताको अपेक्षाअनुसार काम गर्नुपर्ने आवश्यकता औँल्याए।

सभाध्यक्ष केसीले २०१५ सालको पहिलो संसदीय निर्वाचनपछि गत फागुन २१ गते सम्पन्न प्रतिनिधिसभा निर्वाचनले ऐतिहासिक उपलब्धि हासिल गरेको उल्लेख गरे। उनले जनताको अपेक्षाअनुसार शासन प्रणालीमा आमूल परिवर्तन आवश्यक रहेको धारणा राखे। नवगठित प्रतिनिधिसभालाई जनताले ठूलो भरोसाका साथ हेरिरहेको बताउँदै उनले भने, ‘जनताले केवल सरकार परिवर्तन मात्र होइन, शासन सञ्चालनको संस्कार र संस्कृति नै परिवर्तनको खोजी गरेका छन्।’

उनले प्रधानमन्त्री बालेन्द्र शाह तथा मन्त्रिपरिषद्का सदस्यहरूलाई बधाई दिँदै सरकारले सार्वजनिक गरेको १०० बुँदे सुधार कार्यक्रमलाई स्वागतयोग्य कदमको संज्ञा दिए। सो कार्यक्रमले जनताका आकांक्षालाई सम्बोधन गर्ने दिशामा सकारात्मक सुरुवात गरेको उनको भनाइ थियो।

लोकतन्त्रको आधार संवाद, सहमति र सहकार्य भएको उल्लेख गर्दै केसीले सत्तापक्ष र प्रतिपक्षबीच रचनात्मक सहकार्यको आवश्यकता औँल्याए। ‘वाद, प्रतिवाद र संवाद नै लोकतन्त्रको आत्मा हो,’ उनले भने, ‘हामीले यी तीनै तत्वलाई मर्यादित ढङ्गले अघि बढाएपछि मात्र राष्ट्र हितमा काम गर्न सकिन्छ।’

उनले संवैधानिक संस्थाहरूको निष्पक्षता, पारदर्शिता र विश्वसनीयता सुदृढ गर्नुपर्नेमा जोड दिँदै संसद्लाई प्रभावकारी बनाउन शिष्ट, मर्यादित र जिम्मेवार व्यवहार हुने अपेक्षा व्यक्त गरे। गरिबी, बेरोजगारी, महँगी र सामाजिक असमानता जस्ता समस्यालाई साझा चुनौतीका रूपमा उल्लेख गर्दै उनले यस्ता समस्याबाट मुक्ति दिलाउन संसद्ले प्रभावकारी भूमिका खेल्नुपर्ने धारणा राखे।

संविधानको मर्मअनुसार समावेशिता, समानता र जनसत्ता सुदृढ गर्न सबै पक्ष एकजुट हुनुपर्नेमा उनले जोड दिए। नवगठित सरकार र प्रतिनिधिसभामार्फत जनताका अपेक्षा पूरा हुने विश्वास व्यक्त गर्दै उनले भने, ‘जनताको चाहना पनि यही हो। गठन हुन बाँकी विषयमा पनि सहमतिका आधारमा निर्णय गरी जनहित र राष्ट्रहितमा प्रभावकारी काम गर्ने विश्वास लिएको छु।’

सभामुखको निर्वाचन नभइसकेको अवस्थामा प्रतिनिधिसभाका ज्येष्ठ सदस्यका रूपमा उनले बैठकको अध्यक्षता गरेका थिए। उनको सम्बोधनपछि सभाको पहिलो बैठकले सकारात्मक सन्देश दिएको छ। अब सभामुख चयन लगायतका बाँकी प्रक्रियाहरू सहज रूपमा अघि बढ्ने अपेक्षा गरिएको छ।