सरकार सत्ताका लागि होइन, परिणामका लागि बनेको हो : नेता सुदीप
काठमाडौं – नेपाली कम्युनिस्ट पार्टीका नेता झक बहादुर मल्ल ‘सुदीप’ले वर्तमान सरकार केवल सत्ता सञ्चालनका लागि नभई काम र परिणामका लागि बनेको बताएका छन्। उनले यो सरकारलाई उन्नत समाज, परिष्कृत चेतना र गतिशील शासनको जीवित प्रतिबिम्ब प्रस्तुत गर्ने ऐतिहासिक अवसरसँग जोडिएको धारणा राखे।
नेता सुदीपले भने : “यो सरकार केवल सत्ता सञ्चालनका लागि होइन, काम र परिणामका लागि बनेको सरकार हो—उन्नत समाज, परिष्कृत चेतना र गतिशील शासनको जीवित प्रतिबिम्ब प्रस्तुत गर्ने ऐतिहासिक अवसर यसैसँग जोडिएको छ।”
उनले विगतका त्रुटिपूर्ण अभ्यासलाई समेत औंल्याउँदै भने : “युथ काउन्सिल, बारबरा, टिओबी जस्ता संस्थाहरूको अदृश्य छायाँले सरकारलाई निर्देशित गर्ने अवस्था दोहोरिनु हुँदैन। राज्य सञ्चालनमा स्वायत्तता, पारदर्शिता र उत्तरदायित्वको स्पष्ट अनुभूति नागरिकले पाउनैपर्छ।”
पूर्वाग्रह छोड्न आग्रह गर्दै उनले थपे : “बिगतका पूर्वाग्रह बोकेर वर्तमान सरकारको मूल्याङ्कन गर्ने होइन; उसले अघि सारेको भविष्यको मार्गचित्र, त्यसप्रतिको निष्ठा, दृढता र कार्यान्वयन क्षमताका आधारमा धारणा निर्माण गरिनुपर्छ।”
हालको सरकारको कामप्रति आशावादी बन्दै उनले भने : “हालको संकेत हेर्दा, सरकारको गति समयको मागसँग मेल खाँदै अगाडि बढिरहेको अनुभूति हुन्छ। यही प्रतिबद्धता, यही लय र यही उत्तरदायित्व कायम रहोस्—किनकि यो सरकार सफल हुनु भनेको केवल सरकारको सफलता होइन, राष्ट्रको भविष्यप्रतिको विश्वासको विजय हो।”
नेता सुदीपको पूर्ण भनाइले वर्तमान सरकारप्रति स्पष्ट विश्वास, विगतका कमजोरीबाट सिक्नुपर्ने आवश्यकता र भविष्यप्रति आशावादी दृष्टिकोणलाई एकैसाथ उजागर गरेको छ।
