‘सुपर मारियो ग्यालेक्सी’ : तारामण्डलको यात्रा सुरु, चिनियाँ सिनेमाघरमा नयाँ उत्साह

बेइजिङ । निकै प्रतिक्षित एनिमेटेड फिल्म ‘द सुपर मारियो ग्यालेक्सी मुभी’ अप्रिल ३ देखि चीनभरका सिनेमाघरहरूमा प्रदर्शन सुरु भएको छ। तारासम्म पुग्ने यो फिल्मले परिवारलाई लक्षित गर्दै मनोरञ्जनको नयाँ उचाइ दिने अपेक्षा गरिएको छ।

हरभाथ र माइकल जेलेनिकद्वारा निर्देशित र म्याथ्यू फोगेलद्वारा लिखित यस फिल्ममा प्रतिभाशाली कलाकारहरूको आवाज सुन्न सकिन्छ। क्रिस प्राट, अन्या टेलर–जोय, चार्ली डे, ज्याक ब्ल्याक र कीगन–माइकल कीले पहिलो फिल्मकै आफ्नो भूमिका दोहोर्याएका छन्। साथै, बेनी स्याफ्डी, डोनाल्ड ग्लोभर र ब्री लार्सन नयाँ रूपमा यो फिल्ममा सहभागी भएका छन्।

फिल्मको कथाअनुसार, मारियो र लुइजी राजकुमारी पीच तथा टोडसँगै अन्तरिक्ष र आकाशगंगाको यात्रामा निस्कन्छन्। यस क्रममा उनीहरूले योसी र राजकुमारी रोजालिनासँग भेट गर्छन् भाउजर र उसको छोरा भाउजर जुनियरको सामना गर्छन्। खेलाडी र सिनेमाप्रेमीहरूका लागि यस फिल्ममा उत्साहजनक र नोस्टाल्जिक (पुराना सम्झना ताजा गराउने) ‘इस्टर एग’ (लुकाइएका सन्दर्भ) को प्रशस्त व्यवस्था गरिएको छ।

‘द सुपर मारियो ग्यालेक्सी मुभी’ सन् २००७ को भिडियो गेम ‘सुपर मारियो ग्यालेक्सी’ र यसको २०१० को सिक्वेल, साथै निन्टेन्डोको व्यापक मारियो फ्रान्चाइज र ‘स्टार फक्स’ भिडियो गेम श्रृंखलामा आधारित छ। इलुमिनेसन र निन्टेन्डोद्वारा निर्मित तथा युनिभर्सल पिक्चर्सद्वारा वितरण गरिएको यो फिल्म ‘द सुपर मारियो ब्रोस. मुभी’ (२०२३) को सिक्वेल हो।

वितरकहरूले बेइजिङको प्रसिद्ध पर्यटकीय स्थल ‘ताइकु ली सानलिटुन’ (एक ट्रेन्डी खुला हावा किनमेल क्षेत्र) र त्यहाँको उत्कृष्ट ‘एम्परर सिनेमा’ मा विशेष अनुभवको व्यवस्था गरेका थिए। मार्च ३० मा आयोजित एक विशेष प्रदर्शनीमा फिल्मबाट प्रेरित सजावट र संरचनाहरू प्रदर्शन गरिएको थियो। फिल्मको प्रचार अभियानले सांघाई, नान्जिङ, चेङ्दु लगायतका धेरै सहरहरूमा बाहिरी विज्ञापनहरू मार्फत धुम मच्चाएको थियो।

पहिलो ‘द सुपर मारियो ब्रोस. मुभी’ ले चीनमा १७ करोड १० लाख युआन (करिब २५ मिलियन अमेरिकी डलर) र विश्वभर १.३६ बिलियन अमेरिकी डलर व्यापार गरेको थियो, जसले यस फ्रान्चाइजप्रति बलियो चासो रहेको प्रतिबिम्बित गर्छ। अहिले दोस्रो संस्करण आइसकेपछि यसले पहिलोको सफलता दोहोर्याउने त क्या, पार गर्ने अपेक्षा पनि गरिएको छ।