अमेरिकी नौसैनिक दबाब : अर्को विमानवाहक पोत मध्यपूर्वतर्फ, ‘लुगा धुने’ आगोको कथा पनि जोडियो
काठमाडौँ — मध्यपूर्वमा तनाव चुलिएकै बीच अमेरिकाले आफ्नो सैन्य उपस्थिति थप बलियो बनाउने संकेत गरेको छ। पछिल्लो पश्चिमा मिडियाको रिपोर्टअनुसार वाशिङ्टनले अर्को विमानवाहक पोत (एयरक्राफ्ट क्यारियर) सोही क्षेत्रमा पठाउने तयारी गरेको छ।
अमेरिकी अधिकारीहरूको हवाला दिँदै ‘द वाल स्ट्रिट जर्नल’ ले जनाएअनुसार विमानवाहक पोत ‘जर्ज बुस’ लाई मध्यपूर्वतर्फ परिचालन गरिँदै छ। यो पोत हाल यस क्षेत्रमा रहेको अर्को अमेरिकी विमानवाहक पोत ‘अब्राहम लिंकन’ सँगै जोडिनेछ।
रक्षा विश्लेषकहरूका अनुसार ‘जर्ज बुस’ ले हालै आगलागीपछि भूमध्यसागरतर्फ फिर्ता बोलाइएको ‘जेराल्ड फोर्ड’ को स्थान लिने अनुमान गरिएको छ। ‘जेराल्ड फोर्ड’ अहिले क्रोएसियाको बन्दरगाह स्प्लिटमा रहेको जनाइएको छ।
तर, यो सैनिक परिवर्तनको चर्चा गर्दा धेरैको ध्यान उक्त आगलागीकै कारणतिर पुगेको छ। ‘जेराल्ड फोर्ड’ मा लागेको आगोलाई केही सैनिक वृत्त र सामाजिक सञ्जालमा ‘लुगा धुने आगो’ (लान्ड्री फायर) भन्ने व्यङ्ग्यात्मक टिप्पणी गरिएको छ।
रक्षा क्षेत्रको विश्लेषण गर्ने प्लेटफर्म ‘ईस्ट कलिङ’ ले यसलाई ‘कुख्यात लुगा धुने आगो’ भन्दै यस घटनालाई अर्कै अर्थमा उजागर गरेको छ। यसरी विशाल विमानवाहक पोतमा लागेको आगोलाई ‘साधारण’ बनाएर प्रस्तुत गर्ने शैलीले पनि सैनिक अभियानको विश्वसनीयता र पछाडिको वास्तविकताबारे प्रश्न उठ्न थालेको छ।
एकातिर अमेरिकाले मध्यपूर्वमा आफ्नो सैन्य हैसियत थप बलियो बनाउँदै दुई विमानवाहक पोत राख्ने तयारी गरिरहेको छ भने अर्कातिर पहिले तैनाथ पोतमा लागेको ‘आगो’ ले योजनामा अनपेक्षित परिवर्तन आएको विश्लेषण गरिएको छ।
विज्ञहरूका अनुसार हाल मध्यपूर्वमा अमेरिकाको यो नौसैनिक परिचालनले इरान, यमन र सो क्षेत्रका अन्य शक्तिहरूबीच तनावलाई थप जटिल बनाउने देखिन्छ। दुई ठूला विमानवाहक पोतको उपस्थितिले अमेरिकाले ‘सबै विकल्प मेजमा राखेको’ संकेत दिएको छ भने, ‘लुगा धुने आगो’ जस्ता घटनाका कारण सैनिक मर्मत र सुरक्षाको विश्वसनीयतामा भने प्रश्नचिह्न खडा भएको छ।
यो समाचार तयार पार्दासम्म पेन्टागनले पोत परिवर्तनको औपचारिक पुष्टि गरेको छैन, तर क्षेत्रीय पर्यवेक्षकहरूले यसलाई अमेरिकी नौसैनिक रणनीतिको महत्त्वपूर्ण पुनर्संरचनाको रूपमा हेरिरहेका छन्।
