इजरायलको चेतावनी : ‘आउने घण्टामा मिसाइल आक्रमणको सम्भावना’, अमेरिकी अल्टिमेटमपछि तनाव चुलियो

तेल अविव । इजरायली रक्षा बल (आईडीएफ) ले मंगलबार राति ‘आउने घण्टाहरूमा’ इजरायली क्षेत्रतर्फ मिसाइल प्रहार बढ्न सक्ने चेतावनी दिएको छ। यो चेतावनी इरानविरुद्ध अमेरिकी अल्टिमेटमको म्याद सकिनुअघि अवस्थाको मूल्याङ्कनपछि आएको हो। अमेरिकी अल्टिमेटमको म्याद बुधबार बिहान ३ बजे (इजरायली समय) सकिँदै छ।

आईडीएफले एक विज्ञप्तिमा जनतालाई ‘सतर्क, सजग र जिम्मेवारीपूर्वक व्यवहार गर्न, र पछिल्लो समय अद्यावधिक हुँदै आएको गृह मोर्चा कमाण्डको निर्देशनको पालना गर्न’ आग्रह गरेको छ। यदि अवस्थाको मूल्याङ्कन परिवर्तन भएमा थप जानकारी दिइने पनि उल्लेख गरेको छ। अमेरिकी राष्ट्रपति डोनाल्ड ट्रम्पले मंगलबार बिहान इरानको ‘सम्पूर्ण सभ्यता आज राति मर्नेछ’ भन्दै धम्की दिएका थिए। उनले इरानलाई सम्झौता गर्न र हर्मुज जलडमरु पुनः खोल्नको लागि म्याद तोकेका थिए। ट्रम्पको त्यो म्याद बुधबार बिहान ३ बजे सकिँदै छ।