अमेरिका-इरान युद्धविरामको छायाँमा लेबनानमा इजरायली आक्रमण जारी

जेरुसेलम । अमेरिका र इरानबीच दुई साताका लागि युद्धविराम घोषणा भएको केही घण्टा नबित्दै इजरायलले लेबनानमा गरेको व्यापक हवाई आक्रमणमा सयौं मानिस हताहत भएका छन्। इजरायली रक्षामन्त्री इजरायल कात्जले बुधबार लेबनानमाथिको आक्रमण निरन्तर जारी रहने घोषणा गर्दै यसलाई इरानसँगको युद्धभन्दा भिन्न रणभूमिको रूपमा हेरिने स्पष्ट पारेका छन्।

एक भिडियो वक्तव्यमार्फत रक्षामन्त्री कात्जले भने, “हामीले इरान र लेबनानलाई दुई भिन्न रणभूमिका रूपमा छुट्याउन जोड दियौं। लेबनानको वास्तविकता परिवर्तन गर्न र उत्तरी इजरायलका बासिन्दाहरूबाट खतरा हटाउन यो आवश्यक छ।” उनले लेबनानमा इजरायली सेना ‘शक्तिका साथ’ परिचालित रहने बताए।

पाकिस्तानले मध्यस्थता गरेको अमेरिका-इरान युद्धविराम लेबनानमा पनि लागू हुने बताएको भए पनि इजरायलले उक्त सहमति लेबनानसम्म विस्तार नहुने अडान राखेको छ। बुधबार बिहानै बेरुत तथा दक्षिणी र पूर्वी लेबनानमा भएका आक्रमणहरूलाई रक्षामन्त्री कात्जले सन् २०२४ सेप्टेम्बरमा हिजबुल्लाहका इलेक्ट्रोनिक उपकरणहरूमा भएको विस्फोट (‘पेजर अपरेसन’) पश्चात्कै सबैभन्दा ठूलो केन्द्रित आक्रमणको संज्ञा दिएका छन्।

इरानलाई समर्थन जनाउन हिजबुल्लाहले मार्चको सुरुमै इजरायलतर्फ रकेटको बर्सात गरेको थियो। सन् २०२४ नोभेम्बर २७ मा इजरायलसँग युद्धविराम लागू भएपश्चात् हिजबुल्लाहले गरेको यो पहिलो आक्रमण थियो। यद्यपि उक्त युद्धविराम अवधिमा पनि इजरायलले दक्षिणी लेबनानमा बारम्बार आक्रमण जारी राखेको थियो। हिजबुल्लाहको आक्रमणपछि इजरायलले पूर्ण पैमानाको आक्रामक कारबाही अघि बढाउँदै दक्षिणी लेबनानमा सेना परिचालन गरी घर तथा पूर्वाधारहरू ध्वस्त पारेको थियो।

रक्षामन्त्री कात्जले हिजबुल्लाहका महासचिव नइम कासिमलाई सीधा चेतावनी दिँदै भनेका छन्, “उनको पालो पनि आउनेछ।” यस घटनाक्रमले मध्यपूर्वमा अमेरिका-इरान युद्धविरामको सहमतिले तत्काल व्यापक शान्ति स्थापना गर्न नसक्ने र क्षेत्रीय द्वन्द्व थप जटिल बन्दै गएको सङ्केत गरेको विश्लेषकहरूको भनाइ छ।