जर्जियाको रेलमा ‘फास्ट ट्रयाक’ क्रान्ति

तिब्लिसी । जर्जियाले आफ्नो रेलवे सञ्जालको क्षमता दोब्बर बनाउने र यात्रु सेवालाई व्यापक विस्तार गर्ने तीन वर्षे महत्त्वाकाङ्क्षी योजना सार्वजनिक गरेको छ। प्रधानमन्त्री इराक्ली कोबाखिद्जेले बुधबार यो घोषणा गर्दै ५० वटा नयाँ लोकोमोटिभ र १५ सय वटा डिब्बा (वागन) खरिद गर्ने योजना रहेको जानकारी दिए।

प्रधानमन्त्री कोबाखिद्जेका अनुसार, यो विस्तार योजनापछि वार्षिक रेल यात्रु सङ्ख्या हालको २० लाखबाट बढेर ५० लाख पुग्ने अनुमान गरिएको छ। उनले भने, “हामी १० वटा नयाँ यात्रुवाहक रेल खरिद गर्नेछौं। यसको परिणामस्वरूप, स्थानीय बासिन्दा र पर्यटक दुवैका लागि यात्रु ढुवानी उल्लेखनीय रूपमा सहज र छिटो हुनेछ।”

योजनाअन्तर्गत राजधानी तिब्लिसीलाई कुताइसीसँग जोड्ने नयाँ सिधा रुट सञ्चालनमा आउनेछ। त्यस्तै, तिब्लिसीदेखि कालो सागर तटीय सहर बातुमी जोड्ने रेलमार्गको स्तरोन्नति आगामी अगस्टमा सम्पन्न हुनेछ, जसले हालको साढे पाँच घण्टाको यात्रा अवधिलाई घटाएर चार घण्टामा सीमित गर्नेछ।

सन् २००९ देखि बन्द रहेको तिब्लिसी-अखाल्तसिखे रुटलाई पुनः सञ्चालनमा ल्याइनेछ, जसको यात्रा अवधि घटाएर तीन घण्टा कायम गरिनेछ। साथै, ऐतिहासिक बोर्जोमी-बाकुरियानी रेलमार्गको पनि पुनर्निर्माण र मर्मत गरिनेछ।

यो महत्त्वाकाङ्क्षी योजनाले जर्जियाको आन्तरिक यातायात सञ्जाललाई आधुनिकीकरण गर्नुका साथै पर्यटन प्रवर्द्धनमा समेत ठूलो टेवा पुर्याउने अपेक्षा गरिएको छ। कालो सागर र ककेसस क्षेत्रको सङ्गममा रहेको जर्जियाले पछिल्ला वर्षहरूमा पर्यटनलाई अर्थतन्त्रको प्रमुख आधारको रूपमा अघि बढाइरहेको छ।