दुई शत्रुबीच संवादको सेतु बन्दै पाकिस्तान

इस्लामाबाद । पाकिस्तानका उपप्रधानमन्त्री एवं विदेशमन्त्री मोहम्मद इशाक डारले शनिबार जारी द्वन्द्वमा संलग्न सबै पक्ष शान्तिपूर्ण समाधानतर्फको प्रयासलाई अघि बढाउन रचनात्मक रूपमा संलग्न हुने आशा व्यक्त गरेका छन्। परराष्ट्र मन्त्रालयले जारी गरेको विज्ञप्तिअनुसार उपप्रधानमन्त्री डारले विवाद समाधानमा संवाद र सहकार्यको महत्त्वमा जोड दिँदै पाकिस्तान दीर्घकालीन र दिगो समाधान हासिल गर्न दुवै पक्षलाई सहजीकरण गरिरहन इच्छुक रहेको दोहोर्याएका छन्।

यो विज्ञप्ति शनिबार अमेरिकी प्रतिनिधिमण्डल इस्लामाबाद आइपुगेपछि सार्वजनिक गरिएको हो। यसअघि नै इरानी टोली पनि पाकिस्तानको राजधानी आइपुगिसकेको छ। मध्यपूर्वमा हालै भएको शत्रुता अन्त्य गर्न दुई पक्षबीच इस्लामाबादमा वार्ता हुने अपेक्षा गरिएको छ। अमेरिकी उपराष्ट्रपति जेडी भान्स र इरानी संसद अध्यक्ष मोहम्मद बाकेर कालिबाफको नेतृत्वमा हुन लागेको यो ऐतिहासिक वार्तालाई विश्व शान्तिका लागि निर्णायक मोडका रूपमा हेरिएको छ।