इस्लामाबाद वार्ता ‘विज्ञ चरण’मा प्रवेश : इरानी सम्पत्ति खुकुलो र आणविक ऊर्जा मुद्दामा विशेषज्ञहरूबीच घनिभूत छलफल सुरु

इस्लामाबाद (पाकिस्तान) । पाकिस्तानको राजधानी इस्लामाबादमा जारी अमेरिका र इरानबीचको ऐतिहासिक वार्ता ‘विशेषज्ञ स्तर’ (एक्सपर्ट लेभल) मा प्रवेश गरेको पाकिस्तानी स्रोतहरूले जनाएका छन्। स्रोतका अनुसार दुवै पक्षका विशिष्टीकृत समितिका केही सदस्यहरू वार्ता स्थलमा पुगिसकेका छन्।

यी विशेषज्ञ समितिहरूमा इरानको रोक्का सम्पत्ति (अनफ्रिजिङ अफ इरानियन एसेट्स) र आणविक ऊर्जासँग सम्बन्धित संवेदनशील मुद्दाहरूमा गहन छलफल गर्न सक्ने विज्ञहरूको सहभागिता रहेको स्रोतले जानकारी दिएको छ। वार्ताको यो चरणले दुई पक्षबीचको कूटनीतिक संवाद प्राविधिक र गम्भीर विषयवस्तुमा केन्द्रित भएको सङ्केत गर्दछ।

यसअघि अमेरिकी उपराष्ट्रपति जेडी भान्स र इरानी संसद अध्यक्ष मोहम्मद बाकेर कालिबाफको नेतृत्वमा उच्चस्तरीय राजनीतिक वार्ता सुरु भएको थियो। अहिले विशेषज्ञ टोलीहरूको संलग्नतासँगै दुई पक्षबीच ठोस विषयहरूमा सहमति जुटाउने प्रयास भइरहेको विश्लेषकहरूको ठम्याइ छ। हालै घोषित दुई साताको युद्धविरामलाई दीर्घकालीन सम्झौतामा बदल्ने लक्ष्यसहित भइरहेको यो वार्तालाई विश्व शान्तिका लागि निर्णायक मोडका रूपमा हेरिएको छ।