अमेरिकाको अतार्किक र अत्यधिक मागका कारण गम्भीर मतभेद कायमै, अब बल अमेरिकी कोर्टमा

इस्लामाबाद । पाकिस्तानको राजधानी इस्लामाबादमा जारी इरान र अमेरिकी प्रतिनिधिमण्डलबीचको वार्ता पाकिस्तानको प्रस्ताव र दुवै पक्षको सहमतिमा एक दिन थप गरिएको छ। अर्धसरकारी तस्नीम समाचार एजेन्सीले आइतबार बिहानै दिएको समाचारअनुसार अमेरिकाको ‘अतार्किक र अत्यधिक माग’ तथा इरानी प्रतिनिधिमण्डलले राष्ट्रिय हित सुनिश्चित गर्नुपर्ने अडानका कारण पाकिस्तानले आइतबार अर्को चरणको वार्ता आयोजना गर्न प्रस्ताव राखेको थियो र दुवै पक्ष सहमत भएका हुन्।

तस्नीमका अनुसार यो घटनाक्रम आइतबार बिहानै सम्पन्न पाकिस्तानी मध्यस्थताको पछिल्लो चरणको वार्ताको अन्त्यमा र दुई प्रतिनिधिमण्डलबीच पाठ्य सामग्री (टेक्स्ट) आदानप्रदान भएपछि भएको हो। शनिबार स्थानीय समय दिउँसो १ बजे (०८०० जीएमटी) सुरु भएको यो वार्ता १४ घण्टाभन्दा लामो समयसम्म चलेको थियो।

तस्नीमले यसअघि नै दुई पक्षबीच केही गम्भीर मतभेदहरू कायमै रहेको उल्लेख गर्दै भनेको थियो, “अमेरिकाले आफ्ना सामान्य अत्यधिक मागहरू त्यागेर महत्त्वाकांक्षी दृष्टिकोणलाई यथार्थवादी दृष्टिकोणले प्रतिस्थापन गर्नुपर्ने बल अब अमेरिकी कोर्टमा छ।” एक सूचित स्रोतलाई उद्धृत गर्दै एजेन्सीले भनेको छ, “दुई पक्षका विशेषज्ञ टोलीबीचको वार्तामा प्रारम्भिक प्रगति हासिल भए पनि प्रतिनिधिमण्डलहरूबीच ‘स्ट्रेट अफ हर्मुज’ र अन्य धेरै मुद्दाहरूमा ‘गम्भीर’ मतभेदहरू कायमै छन् र अमेरिकाको ‘अत्यधिक माग’ का कारण वार्तामा कुनै ठोस परिवर्तन आएको छैन।”

तस्नीमले केही पश्चिमा सञ्चारमाध्यमहरूले विश्वव्यापी ऊर्जा मूल्य नियन्त्रण गर्ने उद्देश्यले वार्ताको ‘सकारात्मक वातावरण’ लाई बढाइचढाइ गरेर प्रस्तुत गरिरहेको पनि दाबी गरेको छ। पछिल्लो चरणको वार्ताबारे तस्नीमको टिप्पणी छ, “अमेरिकाको अत्यधिक मागलाई दृष्टिगत गर्दा, यो चरणको वार्ता संयुक्त रूपरेखा हासिल गर्न इरानी टोलीले अमेरिकीहरूलाई दिएको अन्तिम मौका जस्तो देखिन्छ।”

एक महिनाभन्दा लामो लडाइँपछि यसै साताको सुरुमा भएको युद्धविरामपश्चात् मध्यपूर्वमा तनाव कम गर्ने उद्देश्यले इरान र अमेरिकी प्रतिनिधिमण्डलहरू इस्लामाबादमा वार्तामा छन्।