पश्चिमी अस्ट्रेलिया सरकारले रणनीतिक भण्डारणका लागि ४० लाख लिटर डिजेल खरिद गर्ने, दुर्गम समुदाय र कृषि क्षेत्रलाई लक्षित

पर्थ । पश्चिमी अस्ट्रेलिया (डब्लूए) सरकारले मंगलबार रणनीतिक भण्डारणका लागि ४० लाख लिटर डिजेल सुरक्षित गरेको घोषणा गरेको छ। यो इन्धन दुर्गम समुदाय र कृषि क्षेत्रको लागि आरक्षित रहनेछ। प्रिमियर रोजर कुक तथा ऊर्जा तथा डिकार्बोनाइजेसन मन्त्री एम्बर–जेड स्यान्डरसनले संयुक्त विज्ञप्ति जारी गर्दै राज्य सरकारले स्थानीय इन्धन आपूर्तिकर्ता क्याम्ब्रिज गल्फसँग ४० लाख लिटर डिजेल खरिद गर्ने सम्झौता गरेको जानकारी दिए।

प्रिमियर कुक र मन्त्री स्यान्डरसनले संयुक्त विज्ञप्तिमा भनेका छन्, ‘यो इन्धन पूर्ण रूपमा राज्यको स्वामित्वमा रहनेछ, ताकि सरकारले आवश्यकताको आधारमा सबैभन्दा बढी आवश्यकता भएका क्षेत्र (जस्तै दुर्गम समुदाय र कृषि क्षेत्र) मा यसको परिचालन गर्न सकोस्।’ प्रिमियर कुकले भने, ‘यो डिजेल शतप्रतिशत राज्यको स्वामित्वमा रहनेछ र आवश्यक परेको बेला द्रुत रूपमा कार्य गर्न अनुमति दिनेछ।’

यसअघि सोमबार संघीय ऊर्जामन्त्री क्रिस बोवेनले राष्ट्रिय भण्डारमा ३८ दिनको अनलेडेड पेट्रोल र २८ दिनको जेट इन्धनको तुलनामा ३१ दिनको डिजेल मौज्दात रहेको बताएका थिए। उनका अनुसार देशभर २०५ वटा पेट्रोल पम्पहरूमा डिजेलको कुनै मौज्दात छैन।