इरान युद्ध ‘अन्तिम चरण’मा

काठमाडौ । अमेरिकी राष्ट्रपति डोनाल्ड ट्रम्पले इरानविरुद्धको युद्ध ‘निकै नजिक’ पुगेको दाबी गरेका छन्। मङ्गलबार फक्स न्युजको प्रश्नको जवाफ दिँदै ट्रम्पले यस्तो बताएका हुन्।

यसअघि मङ्गलबार नै ट्रम्पले द न्युयोर्क पोस्टलाई बताएअनुसार अमेरिका र इरानबीचको अर्को चरणको वार्ता ‘आगामी दुई दिनभित्र’ पाकिस्तानमा हुन सक्ने सम्भावना रहेको छ। तर, इस्लामाबादस्थित इरानी दूतावासका एक स्रोतले भने युद्ध अन्त्य गर्न अमेरिका र इरानबीच हुने आगामी चरणको शान्ति वार्ता जुनसुकै समय र स्थानमा हुन सक्ने भए पनि हालसम्म यसबारे केही पनि आधिकारिक नभएको जानकारी दिएको छ।

यसअघि सप्ताहान्तमा इस्लामाबादमा भएको अमेरिकी र इरानी प्रतिनिधिमण्डलबीचको प्रत्यक्ष वार्ता बिना सहमति टुङ्गिएको थियो। इरानले स्थायी क्षेत्रीय युद्धविराम र प्रतिबन्ध हटाउन माग गरेको थियो भने अमेरिकाले प्रमाणीकरणयोग्य आणविक निशस्त्रीकरण र होर्मुज जलडमरूमध्यको पूर्ण पुनः खुलाको सर्त राखेको थियो।

हालको यो द्वन्द्व गत फेब्रुअरी २८ मा सुरु भएको थियो। सो दिन इजरायल र अमेरिकाले तेहरान तथा इरानका अन्य सहरहरूमा संयुक्त आक्रमण गर्दा इरानका तत्कालीन सर्वोच्च नेता अली खामेनी, वरिष्ठ सैन्य कमाण्डर र सर्वसाधारणहरूको ज्यान गएको थियो। त्यसको जवाफमा इरानले इजरायल र मध्यपूर्वस्थित अमेरिकी सम्पत्तिहरूलाई लक्षित गर्दै क्षेप्यास्त्र तथा ड्रोन आक्रमणको शृङ्खला नै सञ्चालन गर्नुका साथै होर्मुज जलडमरूमध्यमा आफ्नो नियन्त्रण थप कडा बनाएको थियो।