मध्यपूर्व द्वन्द्वले मेक्सिको अर्थतन्त्रमा चाप
काठमाडौं । मध्यपूर्व द्वन्द्व जारी रहेमा मेक्सिकोले उच्च मुद्रास्फीतिको चाप र सुस्त आर्थिक वृद्धिको सामना गर्नुपर्ने मेक्सिकन वित्त कार्यकारी संस्थान (आईएमईएफ) ले मङ्गलबार जनाएको छ।
आईएमईएफको मासिक पत्रकार सम्मेलनमा बोल्दै संस्थानकी अध्यक्ष गाब्रिएला गुटिएरेजले सन् २०२६ को अन्त्यसम्ममा मुद्रास्फीति ४.२ प्रतिशत र आर्थिक वृद्धिदर १.४ प्रतिशत रहने हालको अनुमान रहेको बताइन्। उनका अनुसार मध्यपूर्व द्वन्द्वले मेक्सिकोमा पहिल्यैदेखि रहेको स्थायी मूल मुद्रास्फीतिलाई थप बल पुर्याएको छ, जसले ब्याजदरलाई निरन्तर घटाउन कठिन बनाएको छ।
आईएमईएफको राष्ट्रिय आर्थिक अध्ययन समितिका प्रमुख भिक्टर हेरेराले उच्च इन्धन मूल्यले घरपरिवारको खर्च कटौती गराउने र आर्थिक गतिविधिलाई कमजोर बनाउने बताए। उनका अनुसार यातायात लागत बढेसँगै खाद्यान्न, मलखाद र अन्य वस्तुहरूको मूल्यवृद्धिले पनि मुद्रास्फीतिको चाप थपिएको छ।
यसैगरी, आगामी जुलाई १ सम्ममा संयुक्त राज्य अमेरिका–मेक्सिको–क्यानडा सम्झौता (यूएसएमसीए) नवीकरण हुने वा नहुने अनिश्चयले पनि लगानीमा जोखिम थपिएको हेरेराले बताए। विश्व बैंकका अनुसार मेक्सिकोको अर्थतन्त्र सन् २०२५ मा ०.६ प्रतिशतले विस्तार भएको थियो।
